Biznesi juaj në Google Maps: si ta plotësoni profilin.

Si vendos Google se kë të tregojë

Google shpjegon se renditja në kërkimet lokale varet kryesisht nga tri gjëra:

• Sa i përshtatet kërkimit: sa mirë i përgjigjet profili juaj asaj që kërkon personi.
• Sa larg jeni: nga vendi ku ndodhet personi, ose nga vendi që ai shkruan në kërkim.
• Sa i njohur është biznesi: për shembull nga vlerësimet dhe nga faqe të tjera që vendosin linkun tuaj.

Largësinë nuk e ndryshoni dot. Te dy të tjerat mund të ndikoni: me një profil të plotë dhe të saktë, dhe me vlerësime të vërteta. Sipas Google, një vend më të mirë në hartë nuk mund ta kërkoni dhe as ta blini.

Të dhënat bazë: të sakta dhe njësoj kudo

• Emri i biznesit ashtu siç e përdorni në tabelë dhe në fatura. Mos i shtoni slogane, orarin ose emrin e qytetit, nëse nuk janë pjesë e emrit të vërtetë.
• Kategoria kryesore që përshkruan më mirë atë që bëni, për shembull klinikë dentare ose bujtinë. Kategori të tjera shtoni vetëm nëse përshkruajnë vërtet punën tuaj.
• Adresa dhe pika në hartë. Kontrolloni që pika të jetë te hyrja e biznesit. Jo çdo adresë në Shqipëri gjendet lehtë vetëm me rrugë dhe numër. Nëse punoni vetëm te klientët, adresa nuk shfaqet dhe shënoni zonën ku punoni.
• Telefoni me prefiksin +355, që t’ju telefonojnë me një prekje edhe nga jashtë.
• Faqja e internetit, nëse e keni. Emri, adresa dhe telefoni duhet të jenë njësoj në faqe dhe në profil.
• Përshkrimi: disa fjali të thjeshta për atë që ofroni. Google nuk lejon linqe në përshkrim, as tekste që flasin kryesisht për oferta dhe çmime.

Orari, festat dhe sezoni

Nëse orari është i gabuar, klienti mund ta gjejë derën mbyllur, ndërsa Google thotë “Hapur”. Nëse keni orar pune, vendosni orarin e zakonshëm dhe, veç tij, orarin për festat dhe ditët kur nuk punoni.

Për këto ditë, profili ka një fushë më vete (në anglisht “Special hours”). Ajo vlen për ndryshime të përkohshme, si festat, ose kur biznesi mbyllet deri në gjashtë ditë rresht.

Nëse punoni vetëm në sezon, si shumë hotele dhe restorante në bregdet, mos e lini profilin “Hapur” gjatë dimrit. Shënojeni biznesin si të mbyllur përkohësisht dhe hapeni sërish kur rinisni.

Fotot: të vërteta dhe të reja

Fotot i ndihmojnë klientët të kuptojnë çfarë i pret. Përdorni foto të vërteta të biznesit tuaj, jo foto nga interneti:

• hyrja nga rruga, që t’ju gjejnë lehtë;
• ambienti brenda, në dritë dite;
• ajo që ofroni: pjatat, dhomat, punimet ose produktet;
• foto të reja sa herë ndryshon diçka, për shembull pas rinovimit.

Vlerësimet dhe përgjigjet

Kërkojuni klientëve një vlerësim, me gojë ose me një link që ua dërgoni në WhatsApp, pa zgjedhur vetëm ata që duken të kënaqur. Mos u ofroni zbritje ose dhurata në këmbim dhe mos blini vlerësime: rregullat e Google Maps i ndalojnë dhe vlerësime të tilla hiqen.

U përgjigjuni vlerësimeve, pozitive dhe negative. Një përgjigje e shkurtër dhe e qetë tregon se i merrni seriozisht klientët. Te një vlerësim negativ, falënderoni, shpjegoni shkurt dhe ftojeni personin të flasë me ju drejtpërdrejt.

Profili dhe faqja e internetit punojnë bashkë

Profili tregon shkurt kush jeni dhe ku ndodheni. Faqja e internetit shpjegon më shumë: shërbimet, çmimet, fotot, rezervimin. Kur të dyja kanë të njëjtat të dhëna dhe lidhen me njëra-tjetrën, klienti nuk ngatërrohet dhe ju gjen më lehtë.

Në paketën “Faqe biznesi” (nga 1.199 €, pa TVSH) përgatisim edhe profilin tuaj në Google Maps. Në faqen e kontrollit gjeni katër kontrolle që mund t’i bëni vetë sot.

Pyetje të shpeshta